الثلاثاء، 8 سبتمبر 2009

مذكرات ملحدة ... محجبة ..!!!

مذكرات ملحدة ... محجبة ..!!!

تنويه هام :
المقال خاص بأصدقائي من الملحدين أو الذين قد لا يجدوا أي غضاضة في قراءة كلماتي .. وليس لمناقشة قضية الحجاب أو الدين .. لا مكان هنا عندي لمعترض أو مناقش أو غاضب .. لان المقالة تتحدث عن أحداث حقيقية حدثت بالفعل في حياتي وقد نقلتها مع التغير قليلا حرصاً علي شخصيتي الحقيقة .. ولا اعتقد أن نقل أحداث ما يستوجب النزاع أو النقاش ..!


مقدمة ...
الحجاب .. أمر حاولت الابتعاد عنه طوال الوقت .. لكنه ظل يواجهني ويحاصرني بأسم الحب من الأصدقاء والآهل حتى رضخت في النهاية له .. واعتبرته طريقة ما قد تقربني من الإله المزعوم ..
وبصراحة شديدة أراحني الحجاب نوعاً .. مع اعتباره موضة وانتشاره الرهيب ..

ثم حينما بحثت قبيل إلحادي وبعده واجهتني حقيقة مخيفة .. الحجاب ليس حماية .. انه تميز وقولبة للرجل والمرأة .. قولبة الرجل كحيوان لا يفكر إلا في إرضاء غرائزه .. والمرأة كجسد أو وعاء لإرضاء غرائز الرجل ..!!
يمكنك معرفة رأيي الكامل في الحجاب من هنا .

وقتها أحسست بالامتعاض .. وفكرت كيف أتخلص من تلك الكارثة التي ارتديتها دون أن افقد الثقة أو الاحترام المعروف عني أو ينقص حب أهلي وتتغير نظرتهم لي ..
لذا قررت الانتظار قليلا .. تحملت اختناقي منه وتجلدت .. فأصبحت ملحدة ويالا العجب .. محجبة .!!!!
الي هنا لا تنتهي القصة .. بل تبدأ إنها فقط مجرد مذكرات إلحادية تم تحجيبها وإخفائها خوفا من الرجل والعين والتراب والمؤثرات الخارجية الزنديقة .. في انتظار كشفها ..!
========
ده شيطان يا ليالي ..
تقولها صديقتي في استنكار حينما قلت فقط أنى أفكر في ترك الحجاب
كتمت ضحكتي وحاولت إخفاء نظرة عيني المستهجنة لها قائلة ..
عزيزتي أنا فقط أريد تركه .. لم أجد الراحة في ارتدائه .. من الاخر" خنقني "
برده شيطان يا ليالي ..
ازفر في غيظ ثم احول مسار الحديث للحكايات المعتادة مع بعض النميمة

========

جالسة في المنزل في نهار رمضان .. أأكل في أمان الطاسة ..بعض الكعك .. تتدخل أختي العالمة بإلحادي ..
تنظر لي نظرة من طراز
حتى رمضان مش صايمه يا كافرة يا قادرة.. هزلت ..!!
إن شاله تموتي ..!!!
وأنا انظر لها وابتسم في هدوء ..

تترك هي صمتها ويدور الحديث التالي :

هي: ليه مش بتصومي معانا
أنا: ليه ..؟؟ "الابتسامة لازلت موجودة بالطبع "
هي: اقله تحسي بينا .!
أنا في سري: و أحس بيكم ليه انتم ناس غاويين تعذبوا في نفسكم في عز الحر .. انا مالي .. كنت بصوم زمان عشان اقرب للإله وانفذ أوامره دلوقتي أصوم ليه ..؟
هو عذاب وخلاص ..!
ثم انظر لها واضع كلماتي بأسلوب اقل حدة ..

قررت اني لا اصوم ولا اصلي ولا البس حجاب علشان خاطر حد .. انا هاعمل اللي فيه مصلحتى ومصلحة أهلي اللي بحبهم وبس ..

تنظر لي في صمت نفس النظرة السابقة ولسان حالها بيقول الطمي ياصفية .. مافيش فايدة ..

========

مأدبة عائلية ..وأطفال صائمون .. منهم طفلة صغيرة 9 سنوات تحولت شفتيها للون الأبيض من العطش وازرق وجهها من الجوع ..!!

بعد الإفطار .. قالت لها امها التالي :
انتي خدتي ثواب بينا كلنا .. علشان قدرتي تصومي اليوم كله .. تبتسم الطفلة في وهن وفخر ..

وطبعا عداد الحسنات بيعد
========

مأدبة أخري .. وسؤال لقريب متدين ..
أنا: في أحاديث ضعيفة .. ليه منشلهاش ونخلص .. يعني نخلي القوية بس .

هو بأسلوب بسيط :الاحاديث الضعيفة ممكن ناخدها كسند في موضوع ما .. او نتركها لو فيها اشكالية
انا في سري :
يعني من الاخر .. لو بتقول كلمة حلوة نستشهد بيها .. حد هايخدها علينا نقول ضعيفة .. باركتكم اللات .. وحفظتكم الطاسة ...!!

========
حديث مع والدتي .. اقطعه بالجملة التالية :
انا : قررت اسيب الحجاب .
هي : بتتكلمي جد ..!
اه بس مستنية سفر ***** علشان محدش يضايقها بسببي لما اقلعه .
هي : ده شيطان ياليالي .
انا في سري : اشطة ..!
هي : انتي حرة طبعا انا مش عايزة اجبرك علي حاجة بس ليه ..؟
انا : معرفش اتخنقت منه ..!
هي بحكمة : مش قلتلك شيطان .

انا في سري : يادي النيلة ..الطاسة تحرق الشيطان واللي جاب الشيطان ..
هو الشيطان ده واحد فاضيلي وجه يقولي في ودني شيلي الحجاب يا ليالي وانا زي الهبلة حاضر يا اونكل شيطان ..!!

هي تسترسل : بس برده ليه ياليالي .. انتي ماشية كويس اوي وعاقلة .. ومؤدبة ومتدينة .. تسيبي الحجاب ليه بس ... دنتي المفروض تصلي .. يعني مش حرام لما حد كويس اوي زيك يدخل النار وحد مش اوي بس بيصلي يخش الجنة ..!!
ثم تستدرك في سرعة قائلة : العيب مش في الله طبعا ( حاشا وماشا) .. العيب فينا احنا الي مبنفذش أوامره ..!!

انا في سري : يانهار ملون .. أمي كانت هاتلحد في ثانية وراجعت نفسها
((:
..

بالطبع التزمت بالصمت واستمر موشح كنت محرومة منه ورجع تاني .. عن اهمية العبادة وايه اهم من الصلاة يعني .. وليه مش بصلي .. وبعمل ايه في وقتي الفاضي والنت والكلام الفارغ ده .. يمنعني عن الصلاة ليه ... الخ
انا في سري : يا دين اممممممممممممممممممي
شكر خاص للصديق طارق داوكنز!

========

أنا : بفكر انزل النهاردة من غير زف ... احم حجاب
أختي بتعجب : في رمضان ..!!!!!
أنا : عندك حق الناس ها تتخض .. خلاص ابقي "اعيد" بشعري
هي في امتعاض : بصراحة يا ليالي وشك احلي بالحجاب لو قلعتيه ها تبقي مش حلوة
انا بابتسامة : مش مهم .. هي خلاص طقت في دماغي هاقلعه يعني هاقلعه !!!!
تمط شفتيها ونفس نظرة الامتعاض علي محياها وتقول : انتي حرة !
========
اعلم أن الموضوع غاية في الطول ..لكن كل ذلك الحديث السابق نبذة صغيرة من أحداث امتدت لشهور ومحاورات ذلك الشهر بالذات لوجود الجميع وفتح الموضوع بجدية اكبر
أنا فقط أحاول عدم جرحهم .. لكني أريدهم أن يعرفوا انه قراري وحدي ..

الحرية لها ثمن كبير لنيلها ولقد اخترت التضحية ببعض منها من أجلهم لكني لن أضحى بحقي في اختيار ما أريد ..!!
في الحقيقة لقد وضعت خطة تكتيكة هادئة لنيل ما أريد دون أن أجد اعتراض كبير .. ومع هذا لم أتخلص بعد من كل ذلك .. !